Láthair Dé

Meabhraím dom féin, agus mé i mo shuí anseo anois,
go bhfuil Dia ag amharc orm le grá agus ag caomhnú mo bheith
Déanaim stad ar feadh nóiméad agus machnaím ar seo.

Saoirse

A Thiarna, guím ar son do bhronntanas saoirse.
Go dtuga do Spiorad Naomh
treoir dóibh siúd atá i gcumhacht oibriú i gcoir
fíor-cheartas do mhuintir go léir.

Comhfhios

Is oilithrigh sinn go léir ar thuras chugatsa, a Thiarna.
Go ndéanaimis machnamh ar do chuid ama ar domhan,
agus, le do chabhair, go leanaimis do choiscéimeanna.

Briathar Dé

²⁷ “Is mairg daoibh, a scríobhaithe agus a Fhairisíneacha bréagchráifeacha, mar gur cuma sibh nó tuamaí aolta atá go hálainn le féachaint orthu ón taobh amuigh ach iad lán suas istigh de chnámha na marbh agus de gach salachar. ²⁸ Sibhse mar an gcéanna: ón taobh amuigh féachann sibh do dhaoine bheith fíréanta, ach ón taobh istigh tá sibh lán de bhréagchráifeacht agus d’olcas.

²⁹ Is mairg daoibh, a scríobhaithe agus a Fhairisíneacha bréagchráifeacha, mar go dtógann sibh uaigheanna na bhfáithe agus go maisíonn sibh tuamaí na bhfíréan, ³⁰ ag rá: ‘Dá mbeimisne suas in aimsir ár n-aithreacha, ní bheadh aon pháirt againn leo i bhfuil na bhfáithe a dhoirteadh.’ ³¹ Sin mar a thugann sibh fianaise in bhur gcoinne féin gur clann sibh dóibh siúd a d’imir bás ar na fáithe, ³² agus líonaigí suas tomhas bhur n-aithreacha.

Inspioráid

Ina cháineadh ar na scríobhaithe agus na Fairisínigh, déanann Íosa iarracht iad a chroitheadh as a ndaille ar a bhfimínteacht agus a bpeacaí féin. Nuair a fhéachaimid ar ár ndomhan inniu, feicimid nach bhfuil mórán athraithe thar na céadta bliain i dtéarmaí drochghníomhartha agus bróid agus féinspéis. Is peacaigh muid uile agus tá dorchadas i gcroílár an chine dhaonna. Dúirt Íosa linn gurb as croí an duine a thagann drochghníomhartha.

Guímid ar son ár ndomhain agus ar son athrú croí agus go háirithe ar son ár gceannairí, idir pholaitiúil agus reiligiúnach. Agus guímid freisin ar son trócaire Dé orainn féin.

Comhrá

Suím go ciúin le mo Dhia a bhfuil aithne aige ar gach smaoineamh, ar gach riachtanas agus ar gach mian atá ionam, agus ligim dó aire a thabhairt dom sa nóiméad seo. Faighim pé cothú a theastaíonn uaim don turas.

Conclúid

Gabhaim buíochas le Dia as bronntanas a ghrá
agus mé ag imeacht le lúcháir agus dóchas
chun freastal ar a mhuintir.

Áiméan