Láthair Dé

A Íosa dhíl, Tagaim chugat inniu, ag tnúth le do láithreacht. Is mian liom grá a thabhairt duit mar atá grá agat dom. Nár scara aon rud Uait mé riamh.

Saoirse

Tá an cumas ag gach rud grá agus saol níos iomláine a ghineadh ionam,
ach is minic a bhíonn mo mhianta socraithe, gafa, ag bréag chomhlíonadh.
Iarraim go gcumadh tusa, a Dhia, trí mo shaoirse, mo mhianta
i séis bheoga, ghrámhar saibhir i chéile, de réir Do thola.

Comhfhios

Is é a bheith feasach ar rud éigin ná a bheith ar an eolas faoi. A Thiarna, cabhraigh liom cuimhneamh gur thug Tú mo bheatha dom. Go raibh maith agat as bronntanas na beatha. Múin dom moilliú a dhéanamh, a bheith suaimhneach agus taitneamh a bhaint as na pléisiúir a cruthaíodh dom, a bheith feasach ar an áilleacht atá thart timpeall orm: iontas na sléibhte, suaimhneas locha, leochaileacht peitil bláthanna. Ní mór dom a mheabhrú go dtagann na rudaí seo go léir uait.

Briathar Dé

⁴² Bígí ag faire, dá bhrí sin, mar níl a fhios agaibh cén lá a thiocfaidh bhur dTiarna.⁴³ “Bíodh a fhios agaibh é seo, áfach: dá mb’eol don fhear tí cén t-am san oíche a dtiocfadh an bithiúnach, bheadh sé ag faire agus ní ligfeadh sé ballaí a thí a réabadh. ⁴⁴ Sibhse freisin, mar sin, bígí ullamh, óir is ar an uair nach síleann sibh a thiocfaidh Mac an Duine.

⁴⁵ Cé hé, más ea, an seirbhíseach iontaofa ciallmhar ar cheap a mháistir os cionn sclábhaí a theaghlaigh é chun a gcuid bia a thabhairt dóibh i dtráth? ⁴⁶ Is méanar don seirbhíseach sin a bhfaighidh a mháistir é ag déanamh amhlaidh ar theacht dó. ⁴⁷ Deirim libh go fírinneach, ceapfaidh sé os cionn a mhaoine go léir é. ⁴⁸ Agus má deir an drochsheirbhíseach sin ina chroí: ‘Tá mo mháistir ag déanamh moille,’ ⁴⁹ agus go dtosóidh ag bualadh a chomhsheirbhíseach, agus é ag ithe agus ag ól le lucht meisce, ⁵⁰ tiocfaidh máistir an tseirbhísigh sin lá nach mbíonn súil aige leis agus ar an uair nach eol dó, ⁵¹ agus coscróidh sé é,agus tabharfaidh cion na mbréagchráifeach dó. Is ann a bheidh gol agus díoscán fiacla.

Inspioráid

Tá a fhios againn go léir le cinnteacht iomlán go n-imeoidh muid as an saol seo. Níl i lá nó fiú i mí ach caochadh súl i gcomparáid leis an tsíoraíocht. Spreagann Íosa sinn, sa soiscéal seo, machnamh a dhéanamh ar ár mbásanna féin agus ullmhú trí shaol paidreoireachta agus faireachais.

A Thiarna, cabhraigh linn na rudaí tábhachtacha a fheiceáil i solas na síoraíochta.

Comhrá

A Thiarna, cuidigh liom teagmháil a dhéanamh leat. Ní bhíonn a fhios agam i gcónaí conas, ach ba mhaith liom do ghrá a fháil agus osclaím mo lámha agus mo chroí duit. Tar chugam inniu le do thoil.

Conclúid

Lán le láithreacht ghrámhar Dé,
Iarraim air beannacht a thabhairt dom agus mo chéimeanna a threorú
agus mé ag dul chun a chuid oibre a dhéanamh i mo shaol laethúil.

Áiméan