Láthair Dé

Is í síocháin Dé stór na seoda, “péarla an mhórphraghais” – A Thiarna, go bhfaighe mé an tsíocháin seo láithreach, i do láthair naofa.

Saoirse

Iarraim an grásta chun a chreidiúint
i ngach a d’fhéadfainn a bheith agus a dhéanamh
da gceadofaí duit, a Dhia, mo Chruthaitheoir grámhar,
leanúint ar aghaidh dom chruthú, dom threorú agus dom mhúnlú.

Comhfhios

A Athair ar Neamh, táim buíoch díot nach dteipeann ar do ghrá choíche agus go bhfuil do thrócairí nua gach maidin. Nár theipe orm choíche iompú chugat le mo chuid riachtanas, le mo ghrá.

Briathar Dé

¹ Nuair a chuaigh sé ag caitheamh a choda lá sabóide i dteach dhuine de chinn urra na bhFairísineach, iad seo a bhí ann, bhí siad ag faire go géar air.

⁷ Dúirt sé parabal leo siúd a fuair an cuireadh, ar a shonrú dó mar a thoghaidís na chéad áiteanna; dúirt sé leo: ⁸ “Nuair a thabharfaidh duine éigin cuireadh chun bainise duit, ná téigh i do luí sa chéad áit, le heagla go mbeadh cuireadh ag duine eile uaidh ba mhó le rá ná thú, ⁹ agus go dtiocfaidh an té a thug an cuireadh duit féin agus dó sin, á rá leat: ‘Tabhair áit dó seo,’ agus go gcaithfeá ansin agus ceann faoi ort an áit is ísle a ghabháil. ¹⁰ Ach nuair a gheobhaidh tú cuireadh, tar agus lig fút san áit is ísle, sa chaoi, nuair a thiocfaidh an té a thug an cuireadh duit, go ndéarfaidh sé leat: ‘A chara, gabh níos faide suas’; ansin beidh onóir ann duit i láthair chách a bhíonn ag bord leat. ¹¹ Óir gach aon duine a ardaíonn é féin, ísleofar é, agus an té a íslíonn é féin, ardófar é.”

¹² Dúirt sé freisin leis an té a thug an cuireadh dó: “Nuair a bhíonn meán lae nó dinnéar á thabhairt agat, ná cuir gairm ar do chairde ná ar do bhráithre ná ar do ghaolta ná ar do chomharsana saibhre, le heagla go dtabharfaidís sin cuireadh duitse ar a seal agus go ndíolfaí an comhar leat. ¹³ Ach nuair a bhíonn fleá agat á tabhairt, tabhair cuireadh do bhoicht, do mhairtínigh, do bhacaigh, do dhaill; ¹⁴ agus beidh sonas ort, de bhrí nach bhfuil teacht acu ar é a chúiteamh leat; óir cúiteofar leat é in aiséirí na bhfíréan.”

Inspioráid

An té is mó agaibh, ní foláir dó bheith ina sheirbhíseach do chách. ‘Níor tháinig Mac an Duine le go ndéanfaí freastal air ach le freastal agus a bheatha a thabhairt mar fhuascailt ar son mórán.’ An bhfuilim ag iarraidh onóir a fháil ó dhaoine seachas ó Dhia? Beidh tuairimí daoine fúinn éagsúil i gcónaí, agus, sa deireadh, níl aon tábhacht leo ar chor ar bith.

‘A Thiarna, múin dom a bheith flaithiúil, tabhairt agus gan an costas a chomhaireamh, troid agus gan aird a thabhairt ar na créachtaí, saothrú agus gan aon luach saothair a lorg ach amháin a fhios a bheith agam go ndéanaim do thoil’ (Naomh Iognáid).

Comhrá

Is minic a chuir Íosa ceisteanna orthu siúd a tháinig chuige.
Lig dom é a mhothú gar dom anois,
ag éisteacht le mo phaidir agus ag fiafrú
“Conas is féidir liom cabhrú leat?”
“Cad is féidir liom a thabhairt duit?”
“Cad atá uait?”

Conclúid

Glóir don Athair, agus don Mhac, agus don Spiorad Naomh,
mar a bhí sé ar dtús,
atá anois agus a bheidh ann go deo,
domhan gan deireadh. Áiméan

Áiméan