Láthair Dé

Tugaim mé féin i do láthair, a Dhia.
Go dtógfaidh mé am i gcónaí le tabhairt faoi deara agus le taitneamh a bhaint as
an áilleacht atá cruthaithe agat
do mo phléisiúr.

Saoirse

Iarrfaidh mé cúnamh Dé
a bheith saor ó mo chúraimí féin,
a bheith oscailte do Dhia le linn an tráth urnaí seo, agus
aithne a chur air, grá a thabhairt dó agus freastal níos mó air.

Comhfhios

Ag an nóiméad seo, a Thiarna, iompaím mo smaointe chugat.
Fágfaidh mé mo chuid oibre agus mo chúraimí ar leataobh.
Glacfaidh mé suaimhneas agus athnuachan i do láthair.

Briathar Dé

²⁵ Bhí sluaite móra á thionlacan, agus d’iompaigh sé agus dúirt leo: ²⁶ “Má thagann aon duine chugam agus gan fuath a bheith aige dá athair agus dá mháthair agus dá bhean agus dá chlann agus dá dheartháireacha agus dá dheirfiúracha, agus fiú amháin dá anam féin, ní féidir dó bheith ina dheisceabal agam. ²⁷ Cibé nach ndéanann a chros a iompar agus teacht i mo dhiaidh, ní féidir dó bheith ina dheisceabal agam. ²⁸ Óir cé agaibh arb áil leis túr a thógáil, nach suífidh síos ar dtús agus an costas a mheas, féachaint an acmhainn dó é a chríochnú? ²⁹ Le heagla, tar éis dó bonn a leagan agus gan air a chumas é a thabhairt chun críche, go dtosódh an lucht féachana ag fonóid faoi á rá: ³⁰ ‘Thosaigh an duine seo ag tógáil agus níor chumas dó é thabhairt chun críche!’ ³¹ Nó cén rí, agus é ag dul i ngleic cogaidh le rí eile, nach suífidh síos ar dtús ag déanamh comhairle, féachaint an bhféadfaidh sé dul, líon deich míle, faoina dhéin siúd atá ag déanamh air agus fiche míle aige? ³² Agus mura bhféadann, le linn dó siúd bheith i bhfad uaidh, cuireann sé teachtaí chuige ag iarraidh coinníollacha síochána. ³³ A dhála sin díreach, gach duine agaibhse nach dtréigeann a mhaoin uile ní féidir dó bheith ina dheisceabal agam.

Inspioráid

Ar an gcéad amharc, d’fhéadfadh sé seo a bheith cosúil le sliocht soiscéil an-gharbh, ach níor cheart na sleachta seo a ghlacadh ar leithligh ón gcuid eile den Soiscéal, agus is cinnte nár cheart iad a ghlacadh go litriúil. Dúirt Íosa linn daoine eile a ghrá, gan fuath a bheith againn dóibh. Ba chuid den pheideagógaíocht Ghiúdach é áibhéil a dhéanamh ar mhaithe le béim. Caithfidh Dia agus ríocht Dé teacht i gcónaí ar dtús inár saol, agus is féidir le ceangal le rudaí ábhartha teacht idir sinn féin agus Dia. Guímid ar son breithiúnais cheart agus scaradh cuí ó rudaí an tsaoil.

Comhrá

A Thiarna, cuidigh liom teagmháil a dhéanamh leat. Ní bhíonn a fhios agam i gcónaí conas, ach ba mhaith liom do ghrá a fháil agus osclaím mo lámha agus mo chroí duit. Tar chugam inniu le do thoil.

Conclúid

Gabhaim buíochas le Dia as bronntanas a ghrá
agus mé ag imeacht le lúcháir agus dóchas
chun freastal ar a mhuintir.

Áiméan