Láthair Dé

A Thiarna dhíl, ghlaoigh tú as m’ainm orm.
Mhúnlaigh tú i ndearna do láimhe mé.
Go bhfása muinín ionam agus nár ghéillé mé riamh don éadóchas .

Saoirse

Iarraim an grásta
scaoileadh le mo chúraimí féin
agus bheith oscailte don méid atá Dia ag iarraidh orm,
agus ligean don gCruthaitheoir grámhár mé a threorú agus a mhúnlú.

Comhfhios

Fiafraím conas atáim ionam féin inniu.
An bhfuil mé thar a bheith tuirseach, faoi strus, nó as foirm?
Má bhaineann aon cheann de na tréithe seo liom,
an féidir liom triail a bhaint as scaoileadh leis na hábhair imní a chuireann isteach orm?

Briathar Dé

²⁰ “Ach nuair a fheicfidh sibh Iarúsailéim arna timpeallú ag sluaite armtha, bíodh a fhios agaibh ansin go bhfuil a lomscrios in achmaireacht^{, 21} Ansin, iad seo a bheidh in Iúdáia, teithidís faoi na sléibhte; iad seo a bheidh sa chathair, imídís aisti; iad seo a bheidh ar an tuath, ná téidís isteach inti; ²² óir is laethanta díoltais iad seo, nuair nach foláir gach a bhfuil scríofa a chomhlíonadh. ²³ Is mairg do na mná a bheidh ag iompar clainne nó ag tabhairt cíche sna laethanta sin! Go deimhin, beidh éigean mór sa tír agus díbheirg chun an phobail seo; ²⁴ titfidh siad e béal an chlaímh; seolfar ina mbránna iad ar fud na náisiún uile; agus beidh Iarúsailéim á satailt ag gintlithe nó go dtiocfaidh aimsirí na ngintlithe chun críche.

²⁵ “Agus beidh comharthaí sa ghrian agus sa ghealach agus sna réaltaí. Ar an talamh beidh duainéis ar na náisiúin, iad ar mearbhall ó ghlór agus ó mhórtas na farraige; ²⁶ daoine i bhfantaisí éaga le barr eagla agus imní faoi na nithe atá le breith ar an gcruinne; óir beidh cumhachtaí na bhflaitheas ar crith. ²⁷ Agus ansin feicfear Mac an Duine ag teacht sa scamall le cumhacht agus iomad glóire. ²⁸ Nuair a thosóidh na nithe sin ag teacht, seasaígí suas agus ardaígí bhur gceann, óir tá bhur bhfuascailt in achmaireacht.” ^,

Inspioráid

Ní mór go gcomhlíonfar na tairngreachtaí sna scrioptúir, agus i n-am tráth, tiocfaidh gach rud i gcrích. Laistigh de dhaichead bliain, tháinig an rud a thuar Íosa anseo i gcrích. Tabharfaidh Dia, arb é an an Neach is Airde é, agus é uilechumhachtach, i gcrích gach a bhfuil beartaithe aige. Glacaimis an chéad leath den Ár nAthair agus, ag baint úsáide as an dara modh urnaí de chuid Naomh Iognáid, guímis é frása ar fhrása.

Comhrá

Cad iad na mothúcháin atá ag ardú ionam agus mé ag guí agus ag machnamh ar Bhriathar Dé?
Samhlaím Íosa é féin ina shuí nó ina sheasamh in aice liom agus osclaím mo chroí dó.

Conclúid

Gabhaim buíochas le Dia as na cúpla nóiméad seo a chaitheamar le chéile agus as aon léargas a fuair mé maidir leis an téacs.

Áiméan