Láthair Dé

Tugaim mé féin i do láthair, a Dhia.
Go dtógfaidh mé am i gcónaí le tabhairt faoi deara agus le taitneamh a bhaint as
an áilleacht atá cruthaithe agat
do mo phléisiúr.

Saoirse

A Thiarna Dia, gabhaim buíochas leat as bronntanas na saoirse.
Cuidigh liom an bronntanas seo a úsáid le hionracas.
Tá mé saor chun roghanna a dhéanamh.
Cuidigh liom tú a leanúint,
maireachtáil ar bhealach Críostaí trí aire a thabhairt do dhaoine eile.
Cuir i gcuimhne dom machnamh a dhéanamh i gcónaí ar na daoine atá níos measa as ná mé,
an duine faoi chois, an príosúnach, iad siúd nach bhfuil saor chun adhradh go poiblí.
Treoraigh mé i gcónaí chun do thoil naofa a lorg i ngach imeacht de mo shaol.

Comhfhios

Agus mé ag caint leat, a Dhia,
cuidigh liom cur leis an tuiscint atá agam ar bhronntanais na cumarsáide.
Deonaigh go labhróidh mé amach ar son na ndaoine sin nach bhfuil guth acu
agus bíodh focal cineálta agam i gcónaí dóibh siúd atá i ngátar.

Briathar Dé

¹ Labhair Íosa ansin leis na sluaite agus lena dheisceabail: ² “Tá na scríobhaithe agus na Fairisínigh ina suí i gcathaoir Mhaois, ³ agus ó tá siad, déanaigí agus coinnígí a ndeir siad libh, ach ná déanaigí de réir a n-oibreacha, óir ní mar a chéile beart agus briathar acu. ⁴ Ceanglaíonn siad suas ualaí troma do-iompair agus buaileann siad ar ghuaillí daoine iad, ach ní áil leo féin iad a bhogadh le barr méire. ⁵ Déanann siad a n-oibreacha uile d’fhonn go mbeifí á dtabhairt faoi deara. Sin mar a chuireann siad leithead ina bhfiolaictéirí agus fad lena scothóga; ⁶ is maith leo an chéad áit sna fleánna agus na príomhshuíocháin sna sionagóga, ⁷ agus go mbeifí ag beannú dóibh sna háiteanna poiblí, agus go mbeifí ag tabhairt ‘raibí’ orthu. ⁸ Ach ná bíodh ‘raibí’ á thabhairt oraibhse; óir níl ach an t-aon Mháistir oraibh, agus is bráithre sibhse uile. ⁹ Agus ná glaoigí bhur ‘n-athair’ ar aon duine ar an talamh, óir níl agaibh ach an t-aon Athair, an té atá ar neamh. ¹⁰ Agus fós, ná bíodh ‘múinteoirí’ á thabhairt oraibh, óir níl agaibh ach an t-aon Mhúinteoir, an Críost. ¹¹ An té agaibh is uaisle, beidh sé ina sheirbhíseach daoibh. ¹² Agus cibé duine a ardóidh é féin, ísleofar é agus cibé duine a ísleoidh é féin ardófar é.

Inspioráid

Níor cheart do dheisceabail Íosa mórán taispeántas a dhéanamh den reiligiúin, ná níor cheart dóibh teidil onóracha ar nós 'athair', 'múinteoir', agus 'raibí' a lorg. Is é Dia ár múinteoir, agus ní fhoghlaimíonn an fíor-dheisceabal ach ó Dhia. Smaoiním ar an gcaoi a mbeadh sé domsa an áit is ísle a ghlacadh, an méid a deir Íosa faoi umhlaíocht a ghlacadh i ndáiríre. Tosaím mo phaidir trí iarraidh ar Dhia an chabhair a theastaíonn uaim a thabhairt, go humhal agus go fírinneach.

Ina litir chuig na Galataigh, d’iarr Naomh Pól ar bhaill áitiúla an phobail ualaí a chéile a iompar mar, trí sin a dhéanamh, go dtabharfaidís aird ar cheann de phríomhtheachtaireachtaí Dé agus go dtabharfaidís beatha, ní hamháin do dhaoine eile, ach dóibh féin chomh maith.

Comhrá

Suím go ciúin le mo Dhia a bhfuil aithne aige ar gach smaoineamh, ar gach riachtanas agus ar gach mian atá ionam, agus ligim dó aire a thabhairt dom sa nóiméad seo. Faighim pé cothú a theastaíonn uaim don turas.

Conclúid

Gabhaim buíochas le Dia as na cúpla nóiméad seo a chaitheamar le chéile agus as aon léargas a fuair mé maidir leis an téacs.

Áiméan