Láthair Dé

A Dhia, tá tú níos gaire a chreidim, níos gaire ná m’anáil féin. Táim beannaithe ag do dhlúthchaidreamh liom agus ní gá go mbeadh eagla orm.

Saoirse

A Athair Neamhaí, léirigh dom cibé ualach atá á iompar agam inniu agus tabhair grásta dom é a chur ag bun do Chroise agus dul isteach saor san tráth paidreoireachta seo.

Comhfhios

Fiafraím conas atáim ionam féin inniu.
An bhfuil mé thar a bheith tuirseach, faoi strus, nó as foirm?
Má bhaineann aon cheann de na tréithe seo liom,
an féidir liom triail a bhaint as scaoileadh leis na hábhair imní a chuireann isteach orm?

Briathar Dé

³⁴ “Ná bígí ag ceapadh gur chun síocháin a chur ar an talamh a tháinig mé. Ní síocháin a tháinig mé a chur ann ach claíomh.

³⁵Óir tháinig mé chun duine a chur bunoscionn lena athair agus an iníon lena máthair agus bean mhic le máthair a céile, ³⁶agus is iad lucht a theaghlaigh féin is naimhde do dhuine.

³⁷An té arb ansa leis athair nó máthair ná mé, níl sé diongbhála dom, agus an té arb ansa leis mac nó iníon ná mé, níl sé diongbhála dom; ³⁸agus an té nach nglacann a chros agus mise a leanúint, níl sé diongbhála dom. ³⁹An té a fhaigheann a anam, caillfidh sé é; ach an té a chaillfidh a anam mar gheall ormsa, gheobhaidh sé é.

⁴⁰“An té a ghlacann sibhse, glacann sé mise; agus an té a ghlacann mise, glacann sé an té a chuir uaidh mé. ⁴¹An té a ghlacann fáidh as ucht gur fáidh é, is tuarastal fáidh a gheobhaidh; agus an té a ghlacfaidh fíréan as ucht gur fíréan é, is tuarastal fíréin a gheobhaidh. ⁴²Agus má thugann duine ar bith oiread is an cupán dʼfhíoruisce do dhuine den mhuintir bheag seo, as ucht gur deisceabal é, ní bheidh sé gan a thuarastal a fháil.”

¹Ansin, nuair a bhí deireadh na rialacha sin tugtha ag Íosa dá dháréag deisceabal, dʼfhág sé an áit sin chun dul ag teagasc agus ag seanmóir ina gcathracha.

Inspioráid

Labhair an Pápa Proinsias, go háirithe ina chéad chainteanna díreach i ndiaidh a thoghcháin chuig an bpápacht, faoin gcaoi a bhféadfadh gníomhartha beaga, ar cosúil go bhfuil cuma neamhthábhachtach orthu, rud i bhfad níos mó a léiriú. Léirítear grá, a mhaígh sé, i rudaí beaga. Is minic a bhíonn tionchar i bhfad níos mó ag barróg, aoibh gháire, cúpla focal simplí leo siúd mórthimpeall orainn ná mar a shamhlóimis. Ar maidin inniu féin, luaigh duine éigin go gcuirfeadh an seanmóir a thug mé ag an Aifreann iad ag siúl ar an aer don lá. Níl a fhios agam fúthu, a Thiarna, ach tá a fhios agam go ndéanfaidh a gcuid focal an rud céanna domsa.

Comhrá

A Íosa, bíonn tú i gcónaí ann ag fanacht orm.
Uaireanta bím in abar
le cúramaí an tsaoil seo.
Deonaigh go raibh mé socair níos minicí,
Chun taithí a fháil ar Do shíocháin, ar do shuaimhneas.

Conclúid

Lán le láithreacht ghrámhar Dé,
Iarraim air beannacht a thabhairt dom agus mo chéimeanna a threorú
agus mé ag dul chun a chuid oibre a dhéanamh i mo shaol laethúil.

Áiméan