Láthair Dé

A Thiarna Dia, tabhair dom spiorad ciúin, séimh agus oscailte agus mé ag caitheamh an chúpla nóiméad urnaí seo leat inniu.

Saoirse

A Thiarna Dia, gabhaim buíochas leat as bronntanas na saoirse.
Cuidigh liom an bronntanas seo a úsáid le hionracas.
Tá mé saor chun roghanna a dhéanamh.
Cuidigh liom tú a leanúint,
maireachtáil ar bhealach Críostaí trí aire a thabhairt do dhaoine eile.
Cuir i gcuimhne dom machnamh a dhéanamh i gcónaí ar na daoine atá níos measa as ná mé,
an duine faoi chois, an príosúnach, iad siúd nach bhfuil saor chun adhradh go poiblí.
Treoraigh mé i gcónaí chun do thoil naofa a lorg i ngach imeacht de mo shaol.

Comhfhios

Conas atáim inniu?
Cá bhfuil mé le Dia? Le daoine eile?
An bhfuil rud éigin agam le bheith buíoch as? Ansin gabhaim buíochas.
An bhfuil rud éigin a bhfuil brón orm faoi? Ansin iarraim maithiúnas.

Briathar Dé

³⁴ Nuair a chuala na Fairisínigh nár fhág sé focal ag na Sadúcaigh, chruinnigh siad féin le chéile, ³⁵ agus duine acu, a bhí ina dhlíodóir, chuir sé ceist air ag baint trialach as: ³⁶ “A Mháistir, cén aithne mhór sa dhlí?” ³⁷ Dúirt sé leis: “‘Gráóidh tú do Thiarna Dia ó do chroí go hiomlán agus ó d’anam go hiomlán agus ó d’aigne go hiomlán’— ³⁸ is í sin an aithne mhór agus an phríomhaithne. ³⁹ Agus is cosúil léise an dara ceann: ‘Gráóidh tú do chomharsa mar thú féin.’ ⁴⁰ Ag brath ar an dá aithne sin atá an dlí ar fad agus na fáithe.”

Inspioráid

Ní bhíonn mórán focal ag teastáil i gcuid de na léamha soiscéil chun teagasc thar a bheith tábhachtach an Mháistir a chur in iúl. Sin é an cás anseo. Suigh leis na focail agus féach an chaoi a mbíonn tionchar acu ort.

Comhrá

Is minic a chuir Íosa ceisteanna orthu siúd a tháinig chuige.
Lig dom é a mhothú gar dom anois,
ag éisteacht le mo phaidir agus ag fiafrú
“Conas is féidir liom cabhrú leat?”
“Cad is féidir liom a thabhairt duit?”
“Cad atá uait?”

Conclúid

Gabhaim buíochas le Dia as bronntanas a ghrá
agus mé ag imeacht le lúcháir agus dóchas
chun freastal ar a mhuintir.

Áiméan