Láthair Dé

A Íosa dhíl, glaoim ort inniu ar bhealach speisialta. Den chuid is mó tagann mé ag iarraidh fabhair. Inniu ba mhaith liom a bheith i Do láthair. Deonaigh go dtuga mo chroí freagra ar Do Ghrá.

Saoirse

A Thiarna, scaoilim leis an imní, an doicheall agus an eagla
a choinním grfeim daingean orthu uaireanta.
Deonaigh dom mo lámha agus mo chroí a oscailt chun glacadh go saor leis na tíolacthaí a bhfuil gá agam leo anois.

Comhfhios

Agus fios agam go bhfuil grá ag Dia dom gan choinníoll,
Breathnaím go hionraic thar an lá, a chuid imeachtaí agus mo mhothúcháin.
An bhfuil rud éigin agam le bheith buíoch as? Ansin gabhaim buíochas.
An bhfuil rud éigin a bhfuil brón orm faoi? Ansin iarraim maithiúnas.

Briathar Dé

⁹ Bhí Íosa ag imeacht leis ón áit sin, agus chonaic sé duine darbh ainm Matha ina shuí i dteach an chustaim agus dúirt leis: “Lean mise.” D’éirigh seisean agus lean sé é.

¹⁰ Ina shuí chun boird dó sa teach, tháinig mórán de na poibleacánaigh agus de na peacaigh agus shuigh siad isteach le hÍosa agus lena dheisceabail. ¹¹ Nuair a chonaic na Fairisínigh é sin, dúirt siad lena dheisceabail: “Cén fáth a mbíonn bhur máistir ag ithe leis na poibleacánaigh agus na peacaigh?” ¹² Chuala sé iad agus dúirt: “Ní ag na daoine slána a bhíonn gá le lia ach ag na daoine tinne. ¹³ Ní miste daoibh a chiall siúd a fhoghlaim: ‘Trócaire is áil liom agus ní íobairt.’ Ní hiad na fíréin ach na peacaigh a tháinig mé a ghlaoch.”

Inspioráid

Tá pictiúr cáiliúil le Caravaggio ann a thaispeánann Naomh Maitiú á ghairm ag Críost chun teacht agus oibriú san fhíonghort. Is dócha go raibh an alltacht céanna ar an bhfear bocht leis an gcuid eile againn gur glaodh air, agus a chúlra mar bhailitheoir cánach san áireamh, gan aird a thabhairt ar cháil a shlí bheatha as mímhacántacht. Iarraimid, a Thiarna, go gcloisfimid an glao má thagann sé, go spreagfaí sinn gur tugadh dúinn é, agus go mbeimid in ann glacadh leis an ngrásta chun leanúint ar aghaidh ag máirseáil le buille an drumadóra.

Comhrá

A Íosa, labhraíonn tú liom trí bhriathra na Soiscéal.
Go bhfreagraí mé do ghlaoch inniu.
Múin dom do láimh a aithint ag obair i mo shaol laethúil.

Conclúid

Lán le láithreacht ghrámhar Dé,
Iarraim air beannacht a thabhairt dom agus mo chéimeanna a threorú
agus mé ag dul chun a chuid oibre a dhéanamh i mo shaol laethúil.

Áiméan