Láthair Dé

Tugaim mé féin i do láthair, a Dhia.
Go dtógfaidh mé am i gcónaí le tabhairt faoi deara agus le taitneamh a bhaint as
an áilleacht atá cruthaithe agat
do mo phléisiúr.

Saoirse

Dá mbeadh Dia ag iarraidh rud éigin a insint dom, an mbeadh a fhios agam?
Dá mbeadh Dia do mo chuir ar mo shuaimhneas nó ag tabhairt dúshlán dom, an dtabharfainn faoi deara?
Iarraim an grásta a bheith saor ó mo bhuairimh fhéin
agus oscailte don mhéid atá Dia á rá liom.

Comhfhios

I láthair mo Chruthaitheora grámhar, féachaim go macánta ar mo mhothúcháin le linn an lae: na buaicphointí, na hamanna ísle agus an talamh cothrom. An bhfeicim cá raibh an Tiarna i láthair?

Briathar Dé

¹ San am sin féin tháinig daoine i láthair á insint dó faoi na Gailíligh, a raibh Pioláit tar éis a gcuid fola agus fuil a n-íobairtí a mheascadh ar a chéile. ² Dúirt sé leo á bhfreagairt: “An é is dóigh libh, agus a rá gur fhulaing siad an méid sin, gur mhó de pheacaigh na Gailíligh sin ná na Gailíligh eile go léir? ³ Níor mhó, deirim libh; ach mura ndéana sibh aithrí millfear sibh uile mar an gcéanna. ⁴ Nó an t-ocht nduine dhéag úd ar thit an túr orthu i Siolóam agus gur mharaigh iad, an dóigh libh gur mhó a bhí siad i bhfiacha ná an chuid eile d’áitritheoirí Iarúsailéim? ⁵ Níor mhó, deirim libh, ach millfear sibh uile mar an gcéanna mura mbíonn aithrí déanta agaibh.”

⁶ Dúirt sé an parabal seo: “Bhí fear ann a raibh crann fígí curtha ina fhíonghort aige, agus tháinig sé ag lorg toraidh air agus ní bhfuair. ⁷ Dúirt sé le curadóir na fíniúna: ‘Féach, táim le trí bliana ag teacht ag lorg toraidh ar an gcrann fígí seo agus ní bhfaighim é. Gearr anuas é. Cad chuige a mbeadh an talamh ó rath aige i gcónaí?’ ⁸ Ach dúirt seisean leis á fhreagairt: ‘A mháistir, lig an bhliain seo leis chomh maith, nó go ndéanfaidh mé romhar ina thimpeall agus aoileach a chur leis, ⁹ agus b’fhéidir go dtabharfadh sé toradh uaidh; ach mura dtugann, gearrfaidh tú anuas é feasta.’”

Inspioráid

Thug Íosa dúshlán smaointeoireachta na ndaoine a chreid, is cosúil, gur tharla drochrudaí mar phionós ó Dhia. Ba thragóid uafásach í gur mharaigh Píoláit na Gailíligh, mar a bhí bás na ndaoine a maraíodh nuair a thit túr Siolóam. Is dócha go raibh súil ag na daoine go ndéanfadh Íosa drochghníomhartha Píoláit a cháineadh. Ina áit sin, ghlaoigh sé orthu aithrí a dhéanamh agus d’inis sé parabal faoi garraíodóir grámhar agus trócaireach a thug aire don chrann nár thug toradh. B’fhéidir gur mhaith leat guí ar son treorach agus fiafraí conas is féidir le do shaol toradh a thabhairt i súile Dé.

Comhrá

Uaireanta ní fheadar cad a déarfainn dá mbuailfinn leat go pearsanta, a Thiarna.
Sílim go mb’fhéidir go ndéarfainn “Go raibh maith agat, a Thiarna” as a bheith ann dom i gcónaí.
Tá a fhios agam go cinnte go raibh amanna ann nuair a d’iompair tú mé, a Thiarna,
nuair is trí do neart a d’éirigh liom teacht tríd na hamanna dorcha i mo shaol.

Conclúid

Gabhaim buíochas le Dia as na cúpla nóiméad seo a chaitheamar le chéile agus as aon léargas a fuair mé maidir leis an téacs.

Áiméan