Láthair Dé

A Thiarna, a Dhia, a Chruthaitheoir liom,
Bí gar dom anois.
Éilíonn m’anam do láithreacht.

Saoirse

Tá sé chomh furasta a bheith gafa
le gaistí an rachmais sa saol seo.
Deonaigh, a Thiarna, go mbeinn saor
ó saint agus féiniúlacht.
Cuir i gcuimhne dom go bhfuil na rudaí is fearr sa saol saor in aisce:
grá, gáire, cúram agus comhroinnt.

Comhfhios

Deonaigh, a Thiarna, go mbeinn feasach
agus buíoch as na rudaí maithe go léir a thug tú dom.
Go roinne mé mo bheannachtaí i gcónaí le daoine eile.

Briathar Dé

¹² Tharla sna laethanta sin go ndeachaigh sé amach faoin sliabh chun guí, agus thug an oíche go léir ag guí Dé. ¹³ Agus nuair a bhí ina lá, ghoir sé chuige a dheisceabail, agus thogh dáréag astu agus thug mar ainm orthu, aspail: ¹⁴ Síomón, ar ar thug sé Peadar, agus Aindrias a dheartháir, Séamas agus Eoin, Pilib agus Parthalán, ¹⁵ Matha agus Tomás, Séamas mac Alfáias, agus Síomón ar a nglaotar an díograiseach, ¹⁶ Iúdás mac Shéamais, agus Iúdás Isceiriót a d’iompaigh ina bhrathadóir.

¹⁷ Ar theacht anuas dó in éineacht leo, sheas sé ar thalamh réidh, agus bhí ansin comhthionól mór dá dheisceabail agus slua mór den phobal as Iúdáia go léir agus as Iarúsailéim agus as cósta na Tuíre agus na Síodóine ¹⁸ a tháinig ag éisteacht leis agus ag fáil leigheas ar a ngalair; agus iad seo freisin a bhí á gcrá ag spioraid mhíghlana, bhí siad á leigheas. ¹⁹ Agus bhí an slua ar fad ag iarraidh baint leis, óir bhí cumhacht ag teacht uaidh agus á leigheas uile.

Inspioráid

Fear paidreoireachta ab ea Íosa. Sula ndearna sé na haspail a roghnú, chuaigh sé amach go dtí an sliabh chun guí, agus chaith sé an oíche ar fad ag guí. Roghnaigh sé dháréag aspal mar go seasann siad do dhá threibh déag Iosrael, agus ar an gcaoi sin nasctar an conradh nua agus an sean chonradh.

B’fhéidir gur mhaith leat tú féin a shamhlú mar dhuine de na deisceabail. Cad atá á smaoineamh agus á mhothú agat agus na haspail á n-ainmniú? Cén chaoi a bhfreagrófá dá nglaofadh Íosa d’ainm? An é an chéad rud a déarfá ná ‘Sea’, nó ‘Le do thoil, ní mise, a Thiarna’? Labhair le Dia faoi na rudaí atá á smaoineamh agus á mhothú agat.

Comhrá

Cad iad na mothúcháin, ceisteanna, amhrais nó inspioráidí a chorraíonn Soiscéal an lae inniu ionam? An féidir liom gach rud atá á mhothú agus á mhachnamh agam a thabhairt chuig Íosa, agus fios sólásach agam go bhfuil sé anseo liom i ndáiríre?

Conclúid

Gabhaim buíochas le Dia as na cúpla nóiméad seo a chaitheamar le chéile agus as aon léargas a fuair mé maidir leis an téacs.

Áiméan