Прысутнасць

Душа мая прагне Тваёй прысутнасці, Пане. Калі я скіроўваю свае думкі да Цябе, я знаходжу спакой і суцяшэнне.

Свабода

Добры Божа, напоўні сэрца
жаданнем ведаць і любіць Цябе больш.
Дазволь паслухмяна адгукнуцца на Тваю волю адносна майго жыцця.

Усведамленне

Усведамляючы Тваю прысутнасць, Пане,
праглядаю сваё нядаўняе мінулае.
Прагну быць шчырым з самім сабой адносна ўсяго, што адбылося,
і сваіх думак, слоў і ўчынкаў,
бо я ведаю, што Ты любіш праўду ў сэрцы
і прымаеш мяне такім, які я ёсць.

Божае слова

⁴³Вы чулі, што сказана: “Любі бліжняга твайго і ненавідзь ворага твайго”. ⁴⁴А Я кажу вам: любіце ворагаў вашых і маліцеся за тых, хто пераследуе вас, ⁴⁵каб сталіся вы сынамі Айца вашага, які ў нябёсах. Бо Ён загадвае сонцу свайму ўзыходзіць над дрэннымі і добрымі і пасылае дождж на справядлівых і несправядлівых. ⁴⁶Калі ж вы будзеце любіць тых, хто любіць вас, якую маеце ўзнагароду? Ці ж не тое самае робяць і мытнікі? ⁴⁷І калі вітаеце толькі братоў вашых, што асаблівага робіце? Ці ж не тое самае робяць і язычнікі? ⁴⁸Таму будзьце дасканалымі, як дасканалы Айцец ваш Нябесны.

Разважанне да Божага слова

Чалавек марудна даходзіць да некаторых рэчаў, і нашае разуменне Аб'яўлення ўсё яшчэ ўзрастае. Бог ніколі не перастае любіць усіх, і мы пакліканы ставацца падобнымі да нашага Нябеснага Айца. Молімся аб ласцы бачыць іншых – і то больш і больш – такімі, якімі іх бачыць Бог.

Адна ўсходняя прыпавесць кажа, што дрэва пакідае свой водар нават на сякеры, якая яго сячэ. Нялёгка прабачыць тым, хто ўчыніў нам вялікую крыўду, але ў нас ёсць прыклад Езуса Хрыста і шматлікіх мучанікаў. Памолімся аб ласцы прабачаць іншым і прызнаць сваю патрэбу ў прабачэнні.

Размова

Бог прыйшоў прынесці жыццё, у Целе і ў Слове. Якое жыватворнае слова я атрымаў сёння? Ці, калі мяне нічога не кранула ў малітве, адчуваю жыватворную прысутнасць Езуса побач са мной – у гэтую хвіліну?

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн