Прысутнасць

“Прыйдзіце да Мяне ўсе абцяжараныя, і Я супакою вас”. (Мц 11:28). Вось я, Пане. Прыходжу шукаць Тваёй прысутнасці. Прагну Твайго гаючага дотыку, поўнага моцы.

Свабода

Любыя рэчы, падзеі, з’явы могуць спрычыніцца да ўзрастання ўва мне любові і жыцця,
аднак мае жаданні часта засяроджваюцца на ілюзіях самарэалізацыі.
Я прашу, каб Ты, Божа, праз маю свабоду ўладкаваў мае жаданні так,
каб выявілася хараство мелодыі, багатай на любоў і гармонію, у згодзе з воляй Тваёй.

Усведамленне

Усведамляць штосьці – значыць памятаць, прымаць пад увагу. Божа, дапамажы мне памятаць, што Ты даў мне жыццё. Дзякую Табе за дар жыцця. Навучы мяне запавольвацца, шукаць цішыню і атрымліваць асалоду ад створаных для мяне дабротаў, заўважаць прыгажосць вакол сябе: цуд гор, спакой азёр, крохкасць пялёсткаў. Мне трэба памятаць, што ўсё гэта паходзіць ад Цябе.

Божае слова

¹Аднойчы, калі натоўп ціснуўся да Езуса, каб слухаць слова Божае, Ён стаяў каля возера Генэзарэт. ²І ўбачыў два чаўны, якія стаялі на беразе возера, а рыбакі выйшлі з іх і паласкалі сеткі. ³Увайшоўшы ў адзін з чаўноў, які належаў Сымону, папрасіў яго крыху адплысці ад берага. Пасля сеў і вучыў людзей з чоўна. ⁴Калі скончыў гаварыць, сказаў Сымону: «Адплыві на глыбіню, а вы закіньце сеткі вашыя для ўлову». ⁵Сымон сказаў Яму ў адказ: «Настаўнік, мы працавалі ўсю ноч і нічога не злавілі, але на Тваё слова закіну сеткі». ⁶Зрабіўшы так, яны злавілі вялікае мноства рыбы, аж пачыналі рвацца іхнія сеткі. ⁷І далі знак супольнікам, якія былі ў другім чоўне, каб прыйшлі дапамагчы ім. Тыя прыйшлі і напоўнілі абодва чаўны так, што яны ледзь не танулі. ⁸Калі гэта ўбачыў Сымон Пётр, прыпаў да каленяў Езуса і сказаў: «Адыдзі ад мяне, Пане, бо я чалавек грэшны». ⁹Ад такога ўлову рыбы вялікае здзіўленне ахапіла яго і ўсіх, хто быў з ім, ¹⁰а таксама Якуба і Яна, сыноў Зэбэдэя, якія былі супольнікамі Сымона. Тады сказаў Езус Сымону: «Не бойся, адгэтуль будзеш лавіць людзей». ¹¹А калі выцягнулі чаўны на бераг, пакінулі ўсё і пайшлі за Ім.

Разважанне да Божага слова

Бог паклікаў святога Патрыка пакінуць свой дом і сваякоў і адправіцца на місію ў Ірландыю. Гэтая місія грунтуецца на ягоным былым вопыце рабства, калі ён даглядаў авечак, вучыўся маліцца і залежаць толькі ад Бога. У яго Споведзі вылучаецца вера і ўдзячнасць Богу. Праз наш уласны жыццёвы вопыт Бог заклікае нас ісці за Ім з верай і ўдзячнасцю.

Па загаду Хрыста Пётр закінуў сеткі. Папа Ян Павел ІІ выкарыстаў гэты ж вобраз у сваім закліку да аднаўлення Касцёла. Якую б місію ні даручыў нам Бог, мы заўсёды будзем мець поспех, калі застанемся ў лучнасці з Хрыстом, сапраўднай лазой. Памолімся аб ласцы больш глыбокага даверу да Яго дапамогі.

Размова

Езус часта задаваў пытанні тым, хто прыходзіў да Яго.
Адчуваючы Яго цяпер побач,
уяўлю, што Ён пытаецца ў адказ на маю малітву:
“Чаго ты жадаеш?”
“Як табе дапамагчы?”
“Што Я магу табе даць?”

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн