Прысутнасць

“Прыйдзіце да Мяне ўсе абцяжараныя, і Я супакою вас”. (Мц 11:28). Вось я, Пане. Прыходжу шукаць Тваёй прысутнасці. Прагну Твайго гаючага дотыку, поўнага моцы.

Свабода

Пане, дай мне спазнаць,
што выкананне Тваёй волі прыносіць радасць,
бо Твая воля – маё найглыбейшае жаданне,
і Ты заўсёды прагнеш лепшага для мяне.

Усведамленне

Ведаючы, што Бог любіць мяне безумоўна,
Шчыра праглядаю мінулы дзень, падзеі, пачуцці.
За што я маю быць удзячным? Дзякую Пану.
За якія думкі, словы і ўчынкі я адчуваю жаль? Прашу прабачэння за гэта.

Божае слова

⁸І, хутка адышоўшы ад магілы, са страхам і вялікай радасцю яны пабеглі паведаміць вучням Ягоным. Езус з’яўляецца жанчынам ⁹А Езус, выйшаўшы ім насустрач, сказаў: «Вітайце». Яны ж, падышоўшы, абнялі ногі Ягоныя і пакланіліся Яму. ¹⁰Тады Езус сказаў ім: «Не бойцеся. Ідзіце, паведаміце братам Маім, каб ішлі ў Галілею, там Мяне ўбачаць».

¹¹Калі яны былі ў дарозе, некаторыя з варты прыйшлі ў горад і паведамілі першасвятарам пра ўсё, што сталася. ¹²Тыя сабраліся са старэйшынамі, параіліся і далі жаўнерам даволі шмат срэбранікаў, ¹³13 кажучы: «Скажыце, што вучні Ягоныя прыйшлі ўначы і выкралі Яго, калі мы спалі. ¹⁴14 А калі гэта дойдзе да вушэй намесніка, мы пераканаем яго і ўратуем вас ад непрыемнасцяў». ¹⁵15 Яны ж узялі срэбранікі і зрабілі так, як іх навучылі. І разнеслася чутка пра гэта сярод юдэяў аж да сённяшняга дня.

Разважанне да Божага слова

Раптоўная сустрэча з уваскрослым Панам - жывым пасля жудасных падзей у пятніцу, напэўна, стала вялікім шокам для жанчын. У страху і радасці яны могуць думаць толькі пра тое, каб паспяшацца паведаміць пра гэта Ягоным сябрам. Нам усім падабаецца слухаць добрыя навіны і хочацца дзяліцца імі з іншымі. У нашай сённяшняй малітве з глыбокай удзячнасцю ўвойдзем у настрой радаснага святкавання.

І будзем гатовы дзяліцца добрымі навінамі з іншымі.

Размова

Каб камунікаваць, нам не заўсёды трэба размаўляць.
Калі ўяўляю сябе поруч з Езусам…
і проста гляджу на Яго, а Ён на мяне…
…як я сябе адчуваю?

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн