Дзень 9: Спадарожнікі на шляху

Спадарожнікі на шляху

«Пасля гэтага Пан вызначыў іншых семдзесят двух і паслаў іх па двое перад сабою ў кожны горад і месца, куды сам меўся пайсці. І сказаў ім: “Жніво сапраўды вялікае, ды работнікаў мала; таму прасіце Гаспадара жніва, каб работнікаў паслаў на жніво сваё”» (Лк 10:1-2).

Езус разумеў, што людзям патрэбна сяброўства, і пасылаў вучняў у свет па двое. Ігнацый таксама ведаў пра важнасць сяброўства і супольнасці, таму сабраў групу сяброў, каб падзяліцца досведам сваіх Духоўных практыкаванняў. Група сяброў ператварылася ў Таварыства Езуса і стала вядомая як езуіты. Як і першыя вучні Хрыста, яны таксама былі пасланыя ў свет, каб дзяліцца Добрай навіной Евангелля і мудрасцю Практыкаванняў.

Мінула паўтысячагоддзя, а езуіты і надалей граюць вельмі важную ролю, асабліва ў адукацыі і духоўным кіраўніцтве, а таксама, вядома, працягваюць даваць Духоўныя практыкаванні.

Разважанне

Дзе і з кім я магу знайсці сапраўдную супольнасць і пачуццё прыналежнасці?

Як магу спрыяць любові, спагадзе і гасціннасці ў маёй супольнасці?

Магчыма, я думаю пра ўдзел у рэкалекцыях або шукаю духоўнага кіраўніцтва? Ці мог бы я суправаджаць іншых у іх духоўным падарожжы?

Малітва дня

Пане, я ведаю, што нядобра хадзіць па гэтай зямлі ў адзіноце. Прашу, дай мне ласку знайсці спадарожнікаў, якія прымуць мяне такім, які я ёсць, і дапамогуць мне стаць як мага лепшым. Няхай я таксама навучуся быць сапраўдным і любячым спадарожнікам для іншых.

Малітва навэнны

Пане, стаю ў Тваёй прысутнасці, прыведзены Святым Духам, натхнёны жыццём і навучаннем Твайго слугі Ігнацыя, і прыношу Табе сваю інтэнцыю ў гэты асаблівы час малітвы… (выказаць інтэнцыю). Па прыкладу святога Ігнацыя, я прагну больш Цябе пазнаць, каб мацней палюбіць і больш рашуча ісці за Табой. Паўтараючы яго словы, і ў моцы Твайго Духа, я асмельваюся казаць: “Вазьмі, Пане, і прымі ўсю маю свабоду, памяць, розум і ўсю маю волю – усё, што маю і чым валодаю. Ты мне ўсё гэта даў – Табе, Пане, вяртаю. Усё Тваё. Распараджайся гэтым паводле сваёй волі. Дай мне толькі любоў Тваю і ласку, і мне гэтага хопіць”.