Супакой

Затрымайся на момант, каб знайсці супакой у пачатку малітвы:

Успомні трывогі і клопаты, якія непакоілі цябе апошнім часам… выдыхаючы, падзяліся імі з Богам… магчыма, ты нават здолееш аддаць Яму некаторыя з іх, прынамсі на час малітвы… выдыхаючы, даручы іх Богу… кожны раз, калі ўдыхаеш, удыхай Божую любоў… дазволь ёй напоўніць усё цела… зрабі тры глыбокія ўдыхі і выдыхі. . .

Святое Пісанне

Лк 5:1-6,10-11

Аднойчы, калі натоўп ціснуўся да Езуса, каб слухаць слова Божае, Ён стаяў каля возера Генэзарэт. ўбачыў два чаўны, якія стаялі на беразе возера, а рыбакі выйшлі з іх і паласкалі сеткі. Увайшоўшы ў адзін з чаўноў, які належаў Сымону, папрасіў яго крыху адплысці ад берага. Пасля сеў і вучыў людзей з чоўна. Калі скончыў гаварыць, сказаў Сымону: «Адплыві на глыбіню, а вы закіньце сеткі вашыя для ўлову». Сымон сказаў Яму ў адказ: «Настаўнік, мы працавалі ўсю ноч і нічога не злавілі, але на Тваё слова закіну сеткі». Зрабіўшы так, яны злавілі вялікае мноства рыбы, аж пачыналі рвацца іхнія сеткі. Ад такога ўлову рыбы вялікае здзіўленне ахапіла яго і ўсіх, хто быў з ім, а таксама Якуба і Яна, сыноў Зэбэдэя, якія былі супольнікамі Сымона. Тады сказаў Езус Сымону: «Не бойся, адгэтуль будзеш лавіць людзей». А калі выцягнулі чаўны на бераг, пакінулі ўсё і пайшлі за Ім.

Разважанне

Наступны этап нашага падарожжа да лепшага стану можна вызначыць усяго двума словамі: «Ідзі за Мной». Наш адказ на гэты заклік зойме ўсё жыццё і будзе падлягаць штодзённаму аднаўленню. Ініга суправаджае нас на гэтым шляху, прапануючы этап, які ён называе “Другім тыднем” сваіх Практыкаванняў. Ён запрашае нас усё бліжэй ісці за Езусам, усё глыбей і больш асабіста занурвацца ў Евангелле. Сённяшняе чытанне дае нам моцны і пераканаўчы «запуск» у чарговы этап нашага шляху.

Фактычна, адбываецца менавіта «спуск на ваду», калі Езус сустракае рыбакоў на беразе возера. Спачатку Ён знаходзіць пустыя чаўны, а потым бачыць, што рыбакі затрымаліся на перапынак, каб вымыць свае сеткі. Ці задумваўся ты калі-небудзь, як і дзе Ён можа знайсці цябе? Магчыма, твой духоўны човен таксама прывязаны ля берагу возера, пакуль ты, цалкам законна, займаешся штодзённымі справамі. Аднак гэты перапынак хутка зведае драматычную перамену. Езус уваходзіць у пусты човен Сымона. Проста ўяві, як бы ты сябе адчуваў, калі б Езус увайшоў наўпрост у твой човен жыцця. Калі ты мяркуеш, што ўсё пад тваім кантролем, з’яўляецца гэты незвычайны, загадкавы незнаёмец, які адразу ж бярэцца за справу.

Затым Ён кажа, куды табе плыць: спачатку крыху далей ад берага, каб Яму было зручней звяртацца да натоўпу, а потым выказвае вельмі складаную просьбу: «Адплыві на глыбіню і паспрабуй злавіць рыбу». Здаецца, Ён не ведае, што ты ўсю ноч спрабаваў злавіць тую рыбу, але беспаспяхова. Як, на тваю думку, ты адрэагаваў бы на словы Езуса? Сымон пярэчыць, але ўсё ж робіць так, як Ён просіць.

І мы запрошаныя адплыць на глыбіню. Кожны з нас адчувае заклік працягваць сваё ўнутранае падарожжа, выйсці за межы, якія мы, магчыма, усталявалі для сябе. Шлях з Езусам ніколі не дазволіць нам бяспечна заставацца ў зоне камфорту. «Ісці» — гэта заўсёды дзеяслоў у дзейным стане. Тут маецца на ўвазе навучанне, рух і рост. Да ўсяго чалавецтва скіравана запрашэнне вырасці за межы нашых цяперашніх абмежаванняў і рызыкаваць як болем, так і абяцаннем росту і пераўтварэння. Мудра сказана, што вы ніколі не адкрыеце новыя землі, калі не пакінеце гавань. Мы не даведаемся пра «лепшае», аб якім марым, калі не рызыкнём адплыць у глыбейшыя воды.

Чытанне заканчваецца абяцаннем Езуса, што адгэтуль яны стануць лаўцамі людзей. У адной з памятных гамілій, якую я калісьці чуў, святар сказаў наступнае: «Езус запрасіў іх стаць лаўцамі людзей, таму што яны ўжо былі лаўцамі рыб». Іншымі словамі, Божы заклік заахвочвае нас выкарыстоўваць тыя навыкі, таленты і вопыт, якія ў нас ужо ёсць. Святар спытаў нас: «Што б сказаў вам Езус?» Якія асабістыя дары і здольнасці ты маеш прыўнесці ў гэтую вялікую прыгоду ўнутранай перамены?

Размова з Богам

Магчыма, гісторыя пра пакліканне рыбакоў не ўразіла цябе, бо ты не цікавішся рыбалкай. Калі так, то адкажы на пытанне: «Як Езус запрашае цябе ісці за Ім?» Якія твае таленты, захапленні і досвед патрэбныя Яму для місіі?

Ці не затрымалася тваё духоўнае падарожжа на беразе або на плыткай вадзе? Магчыма, маеш занадта шмат сетак для мыцця і недастаткова часу для плавання? Ці можаш уявіць, як Езус уваходзіць у твой «човен» і просіць зноў адплыць? Што б ты адказаў?

Памаліся на гэтым тыдні запрашэннем «адплыць на глыбіню». Як гучыць гэты заклік для цябе асабіста? Што канкрэтна азначае «глыбіня» ў кантэксце твайго ўнутранага падарожжа?

У святле нашага жыццёвага досведу, ці можа быць так, што ўся чалавечая сям’я паклікана плыць у глыбейшыя воды з імкненнем стаць больш чалавечнымі і сапраўднымі? Што гэта можа азначаць? Якую «рыбу» мы можам знайсці на глыбіні?

Запішы ў сваім дзённіку ўсё, што цябе асабліва ўразіла, і як, на тваю думку, Бог можа клікаць цябе адплыць на глыбіню. Паспрабуй напісаць або намаляваць свой адказ.

Разважаючы пра шматграннасць паклікання, мы можам памаліцца аб ласцы зразумець, што пакліканне азначае для кожнага з нас паасобку і для супольнасці, а таксама аб мужнасці ісці за Ім, куды б Ён нас ні павёў.