Мк 10:2-16

²Тады падышлі да Езуса фарысеі і, выпрабоўваючы Яго, спыталіся, ці дазволена мужу разводзіцца з жонкаю? ³Ён жа, адказваючы, сказаў ім: «Што наказаў вам Майсей?» ⁴Яны сказалі: «Майсей дазволіў напісаць разводны ліст і разводзіцца». ⁵А Езус адказаў ім: «Дзеля жорсткасці сэрца вашага ён напісаў вам гэты наказ, ⁶бо на пачатку стварэння Бог стварыў іх мужчынам і жанчынай. ⁷Таму пакіне мужчына бацьку свайго і маці і злучыцца з жонкай сваёй, ⁸і будуць двое адным целам. Так што яны ўжо не двое, але адно цела. ⁹ Таму, што Бог злучыў, чалавек няхай не разлучае».

¹⁰У доме вучні зноў спыталіся ў Яго пра гэта. ¹¹Ён сказаў ім: «Хто развядзецца з жонкаю сваёю і ажэніцца з іншай, той чужаложыць супраць яе. ¹²І калі жонка развядзецца з мужам сваім і выйдзе замуж за іншага, чужаложыць».

¹³Прыносілі да Езуса дзяцей, каб Ён дакрануўся да іх. Але вучні забаранялі ім. ¹⁴Убачыўшы гэта, Езус абурыўся і сказаў ім: «Дазвольце дзецям прыходзіць да Мяне, не забараняйце ім, бо такім належыць Валадарства Божае. ¹⁵Сапраўды кажу вам: хто не прыме Валадарства Божага, як дзіця, той не ўвойдзе ў яго». ¹⁶І, абняўшы іх, благаславіў, ускладаючы на іх рукі.

“Copyright © 2021 National Council of Churches of Christ in the United States of America. Used by permission. All rights reserved worldwide.”