Прысутнасць

“Прыйдзіце да Мяне ўсе абцяжараныя, і Я супакою вас”. (Мц 11:28). Вось я, Пане. Прыходжу шукаць Тваёй прысутнасці. Прагну Твайго гаючага дотыку, поўнага моцы.

Свабода

Бог не чужы маёй свабодзе.
Наадварот, Дух удыхае жыццё ў самыя ўтоеныя жаданні,
далікатна падштурхоўвае мяне да ўсялякага дабра.
Прашу аб ласцы, каб дазволіць Духу агарнуць мяне.

Усведамленне

Мяне ахінае Твая любячая прысутнасць, Пане,
але я ўсведамляю сваю ўразлівасць і слабасць.
Дзякуй, што магу сутыкнуцца са сваімі недахопамі
у Тваіх міласэрных абдымках.

Божае слова

¹³Гора табе, Харазін! Гора табе, Бэтсаіда! Бо, калі б у Тыры і Сідоне былі цуды, што сталіся сярод вас, яны б даўно, седзячы ў мешкавіне і ў попеле, пакаяліся. ¹⁴Але Тыру і Сідону лепш будзе на судзе, чым вам. ¹⁵І ты, Кафарнаум,

ці будзеш узвышаны аж да неба? Аж да адхлані нізрынешся!

¹⁶Хто слухае вас, Мяне слухае, і хто вас адкідае, Мяне адкідае. А хто адкідае Мяне, адкідае таго, хто паслаў Мяне».

Разважанне да Божага слова

Тыр і Сідон адхілілі Божы заклік да іх, але яны не дасведчылі асобы і служэння Езуса. Харазін і Бэтсаіда ведалі Езуса, але не жадалі адказаць Яму. Памолімся аб ласцы веры, каб прыняць пасланне, усведамляючы, што яно з'яўляецца шляхам да жыцця, а таксама каб навучыцца на памылках тых, хто адкінуў яго.

Божае слова абвяшчаецца як Добрая навіна. Мы можам выслухаць і прыняць гэта блізка да сэрца. Па сутнасці, гэта прыняцце або адкіданне Езуса, а не проста слова. Няхай жа ў нас будуць вушы, каб слухаць, і сэрца, каб жыць Яго пасланнем – Добрай навіной аб нашым збаўленні.

Размова

“Няма цяпер ніякага асуджэння тым, хто ў Хрысце Езусе” (Рым 8:1). Я звяртаюся да Таго, Хто любіць мяне і ведае мяне лепш, чым я магу любіць ці ведаць сябе. Прашу Яго аб тым, што мне цяпер патрэбна.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн