Прысутнасць

Хвілінку паразважаю над прысутнасцю Бога вакол мяне і ўва мне.
Стварыцель сусвету, сонца і месяца, зямлі,
кожнай малекулы, кожнага атама, усяго, што ёсць:
Бог у кожным удары сэрца. Бог са мной – цяпер.

Свабода

Нябесны Ойча, дай мне ўсвядоміць увесь цяжар, ​​які цяпер нясу, і Сваёй ласкай дапамажы пакласці яго ля падножжа Хрыстовага Крыжа і свабодна ўвайсці ў гэты час малітвы.

Усведамленне

Усведамляючы Тваю прысутнасць, Пане,
праглядаю сваё нядаўняе мінулае.
Дазволь мне быць шчырым з самім сабой і з Табой
наконт таго, што я зрабіў сёння,
бо я ведаю, што Ты любіш праўду ў сэрцы
і прымаеш мяне такім, які я ёсць.

Божае слова

²¹У тую гадзіну Ён узрадаваўся ў Духу Святым і сказаў: «Праслаўляю Цябе, Ойча, Пане неба і зямлі, што Ты закрыў гэта ад мудрых і разумных і адкрыў гэта дзецям. Так, Ойча, бо так было Табе даспадобы. ²²Усё перададзена Мне Айцом Маім, і ніхто не ведае кім ёсць Сын, апроч Айца, і кім ёсць Айцец, апроч Сына і таго, каму Сын захоча адкрыць».

²³І, звярнуўшыся асобна да вучняў, сказаў: «Шчаслівыя вочы, якія бачаць тое, што вы бачыце. ²⁴Бо кажу вам, што многія прарокі і каралі хацелі бачыць, што вы бачылі, і не ўбачылі, і чуць, што вы чуеце, і не пачулі».

Разважанне да Божага слова

Езус заўсёды з’яўляецца лепшым узорам малітвы.
Ён сардэчна і проста размаўляе са сваім Умілаваным Айцом у любой сітуацыі. Будзем вучыцца ў Настаўніка і гаварыць ад сэрца з Ім. Ён заўсёды побач.

У адрозненне ад згаданых прарокаў і каралёў, мы, на шчасце, маем прыклад Хрыста і Яго словы. Прыслухаемся ж да парады святой Тэрэзы Авільскай, паглядзім на Яго вачыма веры і прыгадаем, што Дух Святы жыве ў нас.

Размова

Часам я задаюся пытаннем, што б я сказаў, калі б сустрэўся з Табой асабіста, Пане.
Магчыма, так: “Дзякую, Божа, што Ты заўсёды са мной”.
Я дакладна ведаю, што былі часы, калі Ты нёс мяне, Пане,
калі дзякуючы Тваёй сіле я перажыў цёмныя перыяды жыцця.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн