Прысутнасць

Суцішваюся і стараюся ўсвядоміць, што Бог прысутнічае
для мяне тут і цяпер. Ён ёсць у тым, што я раблю,
у людзях і сітуацыях штодзённага жыцця.
Я прыходжу, каб стаць перад Тым, хто заўсёды са мной.

Свабода

Нябесны Ойча, дай мне ўсвядоміць увесь цяжар, ​​які цяпер нясу, і Сваёй ласкай дапамажы пакласці яго ля падножжа Хрыстовага Крыжа і свабодна ўвайсці ў гэты час малітвы.

Усведамленне

Пане, Ты прысутны ва ўсім
і калі я знаходжу час, каб проста пасядзець і пабыць з Табой,
мой розум адпачывае
і я адчуваю Твой супакой.

Божае слова

¹Сапраўды, сапраўды кажу вам: хто ўваходзіць не праз браму на авечы двор, але прабіраецца інакш, той злодзей і злачынец. ²А хто ўваходзіць праз браму, той пастыр авечак. ³Брамнік яму адчыняе, і авечкі слухаюцца голасу ягонага; кліча сваіх авечак па імені і выводзіць іх. ⁴ А калі ўсіх выведзе, ідзе перад імі, і авечкі ідуць за ім, бо ведаюць ягоны голас. ⁵За чужым не ідуць, але ўцякаюць ад яго, бо не ведаюць голасу чужых». ⁶Такую прыпавесць сказаў ім Езус, але яны не зразумелі, што Ён казаў ім.

⁷Тады Езус зноў сказаў: «Сапраўды, сапраўды кажу вам: Я – брама для авечак. ⁸Усе, колькі іх прыходзіла перада Мною, – гэта злодзеі і злачынцы, і авечкі не паслухалі іх. ⁹Я — брама. Калі хто ўвойдзе праз Мяне, будзе збаўлены, і ўвойдзе, і выйдзе, і знойдзе пашу. ¹⁰Злодзей прыходзіць дзеля таго, каб красці, забіваць і нішчыць. Я прыйшоў, каб вы мелі жыццё і мелі ў дастатку.

Разважанне да Божага слова

Толькі Езус з'яўляецца сапраўднай брамай аўчарні. У гісторыі хапала іншых ілжэпрарокаў і ілжэмесій, як Ён і прадказваў. Вернасць Богу ў малітве і хрысціянскім жыцці дазваляе паступова навучыцца распазнаваць Яго голас у нашых сэрцах. Мова Бога - цішыня і любоў, і мы павінны навучыцца слухаць Яго ў сваім сэрцы, жыць у Ягонай прысутнасці.

Размова

Зараз я ўяўляю перад сабой адну з Асобаў Тройцы, Айца, Сына ці Святога Духа, хто прыйдзе ва ўяўленне найбольш натуральным чынам, і вяду сардэчную размову аб сённяшнім фрагменце Пісання або падзях майго жыцця, якія хвалююць мяне ў гэты момант.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн