Прысутнасць

Пане, пакуль я тут,
напоўні маё сэрца і ўсю маю істоту
цудам Тваёй прысутнасці.

Свабода

Пане, дазволь мне заўсёды
выконваць Тваю святую волю,
ведаючы, што Твая моц
правядзе мяне скрозь усе выпрабаванні.

Усведамленне

У гэты момант, Пане, я скіроўваю думкі да Цябе.
Я пакіну ў баку свае справы і клопаты.
Адпачну і аднаўлю сілы ў Тваёй прысутнасці.

Божае слова

⁴⁴Валадарства Нябеснае падобнае да скарбу, схаванага ў полі, які знайшоў чалавек і ўтаіў. У радасці ад гэтага ён ідзе і прадае ўсё, што мае, і купляе гэтае поле.

⁴⁵Яшчэ Валадарства Нябеснае падобнае да купца, які шукае прыгожых пярлін. ⁴⁶Знайшоўшы адну каштоўную пярліну, ён ідзе і прадае ўсё, што мае, і купляе яе.

Разважанне да Божага слова

Вялікая радасць — адкрыць скарб, які прыйшоў даць нам Хрыстус. За яго варта аддаць усё. Небяспека ў тым, што, купіўшы поле і схаваўшы скарб, мы можам забыць, дзе менавіта яго закапалі, і з-за такой неахайнасці згубіць яго. Айцец Джэрард Х'юз SJ, пісаў: «Многія сядзяць, ахоўваючы скарбніцу, і ніколі яе не адчыняюць».

Малітва ўсім сэрцам — вось ключ да адкрыцця скарбу і велізарнай радасці, якія ляжаць у аснове Евангелля. Святая Тэрэза Авільская сцвярджала, што мы можам нават пачаць перажываць неба на зямлі. Яна прыгадвае нам, што скарб знаходзіцца ўнутры нас.

Размова

Якія ласкі хоча ўдзяліць мне Бог ў гэтай малітве? Услухаюся, у цішыні сэрца, што Пан кажа мне…

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн