Прысутнасць

Езу, сёння я звяртаюся да Цябе інакш, чым звычайна. Часцей я прыходжу з просьбамі. Сёння хачу проста пабыць у Тваёй прысутнасці. Няхай маё сэрца адгукнецца на Тваю Любоў.

Свабода

Стараюся адмовіцца ад любых забабонаў і абмежаванасці мыслення,
якія могуць затуманіць мой зрок у гэты момант.
Аддаю ўсё міласэрнаму клопату Бога, каб маліцца ў свабодзе, праўдзе і яснасці.

Усведамленне

Пане, Ты прысутны ва ўсім
і калі я знаходжу час, каб проста пасядзець і пабыць з Табой,
мой розум адпачывае
і я адчуваю Твой супакой.

Божае слова

⁵⁴Прыйшоўшы на сваю бацькаўшчыну, вучыў іх у сінагозе іхняй, так што яны здзіўляліся і казалі: «Адкуль у Яго гэтая мудрасць і моц? ⁵⁵Ці ж гэта не сын цесляра? Ці не Ягоную Маці завуць Марыя, а братоў Ягоных — Якуб і Юзаф, Сымон і Юда? ⁵⁶І сёстры Яго ці не усе сярод нас? Адкуль жа ў Яго усё гэта?» ⁵⁷І абураліся на Яго. А Езус сказаў ім: «Няма прарока без пашаны, хіба што на бацькаўшчыне і ў доме яго». ⁵⁸І не ўчыніў там многіх цудаў з прычыны іхняга бязвер’я.

Разважанне да Божага слова

Езус пражыў паўнавартаснае чалавечае жыццё, Яго не абмінулі выпрабаванні, горыч і няўдачы, з якімі сутыкаемся ўсе мы. Ён прыходзіць у роднае паселішча, але гэты візіт становіцца стратай для землякоў, якія не распазналі Яго. А як я прымаю расчараванні і няўдачы?

Наколькі добра я выкарыстоўваю дадзеныя мне магчымасці, каб узрастаць у даверы і любові?

Размова

Божае Слова заўсёды плённае.
Ці гэта актуальна для мяне цяпер,
калі гляджу на тое, як прайшла малітва?
Ці адчуваю суцяшэнне?
Ці былі нейкія цяжкасці і выклікі?

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн