Прысутнасць

Бог са мной, але больш таго,
Бог ува мне, напаўняе жыццём.
Хаця б хвіліну пабуду ў жыццядайнай прысутнасці Бога
у маім целе, розуме, сэрцы
і ва ўсім маім жыцці.

Свабода

Добры Божа, напоўні сэрца
жаданнем ведаць і любіць Цябе больш.
Дазволь паслухмяна адгукнуцца на Тваю волю адносна майго жыцця.

Усведамленне

Жыццё поўнае мітусні, мой Пане.
Часта лепшыя намеры застаюцца няздзейсненымі,
але я ведаю, што Ты са мной ва ўсім, што я кажу і раблю,
і ў людзях, якіх бачу штодня.

Божае слова

¹У той час тэтрарх Ірад пачуў пагалоску пра Езуса ²і сказаў слугам сваім: «Гэта Ян Хрысціцель. Ён паўстаў з памерлых, і таму цуды здзяйсняюцца ім». ³Бо Ірад схапіў Яна, закаваў яго і кінуў у вязніцу з-за Ірадыяды, жонкі брата свайго Філіпа, ⁴бо Ян казаў яму: «Недазволена табе мець яе». ⁵Ён хацеў забіць яго, але баяўся народу, які лічыў яго прарокам. ⁶Калі былі народзіны Ірада, дачка Ірадыяды танцавала перад усімі і спадабалася Іраду. ⁷Таму ён пакляўся даць ёй усё, чаго толькі папросіць. ⁸А яна, падбухтораная сваёй маці, сказала: «Дай мне тут на місе галаву Яна Хрысціцеля». ⁹І кароль засмуціўся, але дзеля клятвы і тых, хто быў за сталом, загадаў даць. ¹⁰Таму паслаў у вязніцу адсячы галаву Яну. ¹¹І прынеслі галаву яго на місе, і далі дзяўчыне, а яна занесла сваёй маці. ¹²Тады вучні Янавы прыйшлі, забралі цела і пахавалі яго. Потым пайшлі расказаць Езусу.

Разважанне да Божага слова

Ірад захапляўся Янам Хрысціцелем і прыслухоўваўся да яго. Хутчэй за ўсё, ён пашкадаваў, што загадаў яго забіць. Кажучы, што Ян уваскрос, ён, магчыма, спрабаваў супакоіць сваё сумленне. Але ніякія мары не могуць адмяніць нашых учынкаў. Будзем маліцца аб тым, каб Бог дапамог нам быць сумленнымі і цэласнымі людзьмі.

Размова

Пане, дапамагай мне кожны дзень
шукаць Тваёй прысутнасці ўсё больш і больш.
Напоўні сэрца любоўю да Цябе.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн