Лк 21:5-19 (НП)

⁵Калі некаторыя гаварылі пра святыню, што яна ўпрыгожана каштоўнымі камянямі і дарамі, Ён сказаў: ⁶«Прыйдуць дні, калі з таго, што вы тут бачыце, не застанецца каменя на камені, які не будзе зруйнаваны».

⁷Спыталіся ў Яго: «Настаўнік, калі ж гэта станецца і што будзе знакам, калі гэта павінна адбыцца?» ⁸Ён сказаў: «Глядзіце, каб вас не звялі, бо многія прыйдуць пад імем Маім, кажучы, што гэта Я і што наблізіўся час. Не ідзіце за імі.

⁹Калі ж пачуеце пра войны і хваляванні, не палохайцеся, бо спачатку гэта павінна адбыцца, але не адразу канец». ¹⁰Тады сказаў ім: «Паўстане народ на народ, і каралеўства на каралеўства; ¹¹будуць вялікія землятрусы, а месцамі голад і мор, жахлівыя з’явы і вялікія знакі з неба.

¹²Але перад усім гэтым схопяць вас і будуць пераследаваць, аддаючы ў сінагогі і ў вязніцы, і паставяць перад каралямі і намеснікамі за імя Маё. ¹³І будзе гэта вам на сведчанне. ¹⁴Таму пастанавіце ў сэрцы сваім не клапаціцца наперад, як абараніцца, ¹⁵бо Я дам вам мову і мудрасць, якой не здолеюць супрацьстаяць ці супярэчыць праціўнікі вашыя. ¹⁶Выдаваць вас будуць таксама бацькі і браты, родныя і сябры, а некаторых з вас заб’юць. ¹⁷І зненавідзяць вас усе за імя Маё. ¹⁸Але і волас з галавы вашай не прападзе. ¹⁹Цярпеннем сваім уратуеце душы вашыя.

“Copyright © 2021 National Council of Churches of Christ in the United States of America. Used by permission. All rights reserved worldwide.”