Eoin 15:9-17 ABN
9Faoi mar a thug an tAthair grá domsa, thug mise grá daoibhse chomh maith. Fanaigí i mo ghrá. 10Má choinníonn sibh m’aitheanta, fanfaidh sibh i mo ghrá, faoi mar a choinnigh mise aitheanta m’Athar, agus a fhanaim ina ghrá. 11Dúirt mé na nithe seo libh chun go mbeadh mo lúcháir-sé ionaibh agus go mbeadh bhur lúcháir-sé iomlán.
12Is í seo m’aithne: sibh a thabhairt grá dá chéile, faoi mar a thug mé grá daoibh. 13Níl grá ag aon duine níos mó ná seo go dtabharfaidh duine a anam ar son a chairde. 14Sibhse mo chairde má dhéanann sibh na nithe a ordaím daoibh. 15Ní seirbhísigh a thugaim oraibh feasta, mar ní eol do sheirbhíseach gnó a mháistir. Ach thug mé cairde oraibh, óir gach a gcuala ó m’Athair, chuir mé in iúl daoibh é. 16Ní sibhse a rinne mise a thoghadh, ach mise a rinne sibhse a thoghadh, agus a cheapadh chun go n‑imeodh sibh agus toradh a thabhairt agus go mairfeadh bhur dtoradh; i dtreo, cibé ní a d’iarrfadh sibh ar an Athair i m’ainm, go dtabharfadh sé daoibh é. 17Is iad seo m’aitheanta daoibh: sibh a thabhairt grá dá chéile.
“Copyright © 2021 National Council of Churches of Christ in the United States of America. Used by permission. All rights reserved worldwide.”
Machnamh on Eoin 15:9-17 ABN
Inspioráid - 2025-05-14 Paidir Laethúil
Cruthaítear fíorghrá i ngníomhartha seachas i bhfocail. Laghdaigh ár dTiarna na haithne go léir go dtí dhá cheann, agus is é atá iontu ná an t-aon aithne mhór amháin chun grá a thabhairt. Is as aon chroí amháin a thugann muid grá do Dhia agus do chomharsa araon. Sin é croílár ár saoil ar talamh, sé sin forbairt a dhéanamh ar an gcumas a fuaireamar ó Dhia chun grá a thabhairt, ionas gur féidir linn, sa deireadh, cumasc le Dia, arb é an Grá é.
Tugann Íosa cuireadh dúinn uile chun dlúthchairdeas a bheith againn leis. Sa chaidreamh seo, nochtfaidh sé é féin dúinn, agus roinnfidh sé linn, mar a rinne sé lena aspal, an méid atá foghlamtha aige óna Athair. Is cuireadh í an phaidir i gcónaí, agus is fúinn féin atá sé freagairt.