Lúcás 5:33-39 ABN
33 Dúirt siad leis, “Bíonn deisceabail Eoin ag troscadh go minic agus ag déanamh urnaithe, agus deisceabail na bhFairisíneach mar an gcéanna; ach iad seo agatsa, bíonn siad ag ithe agus ag ól.” 34 Dúirt Íosa leo: “An féidir libh a thabhairt ar ógánaigh na bainse troscadh a dhéanamh, le linn don fhear nuaphósta bheith leo? 35 Ach tiocfaidh na laethanta, agus nuair a bheidh an fear nuaphósta tógtha uathu, ansin déanfaidh siad troscadh sna laethanta sin.” 36 Agus dúirt sé parabal leo: “Ní shracann aon duine píosa as casóg nua lena chur mar phreabán ar sheanchasóg: má dhéanann, beidh an chasóg nua sractha aige, agus fós ní réiteoidh an preabán as an gcasóg nua leis an sean. 37 Ná ní chuireann aon duine fíon nua i seanseithí: má chuireann, pléascfaidh an fíón nua na seithí; doirtfear an fíon agus millfear na seithí. 38 Ach fíon nua i seithí nua is cóir a chur. 39 Agus ní bhíonn fonn ar aon duine ar fhíon nua tar éis dó seanfhíon a ól ach deir sé, ‘Is maith an seanfhíon.’”
“Copyright © 2021 National Council of Churches of Christ in the United States of America. Used by permission. All rights reserved worldwide.”
Machnamh on Lúcás 5:33-39 ABN
Inspioráid - 2026-09-04 Paidir Laethúil
San arm, deirtear go bhfuil am ann le fanacht gan corraí, am le dul ar aghaidh agus am le scíth a ligean. Léirigh Íosa do na deisceabail go bhfuil amanna sa saol ann le haghaidh ceiliúrtha chomh maith le hamanna nuair is gá féin-smacht a bheith agat. Treoraigh sinn, a Thiarna, chun go mbeimid in ann ár n-inspreagthaí a aithint agus roghanna ciallmhara a dhéanamh, ionas go mbainfimid an leas is fearr as na cásanna ina bhfuilimid.