Lúcás 7:11-17 ABN

¹¹ Tharla ina dhiaidh sin go ndeachaigh sé isteach i gcathair ar a nglaotar Náín, agus bhí a dheisceabail agus slua mór á thionlacan. ¹² Agus nuair a bhí sé i ngar do gheata na cathrach, bhí marbh á thabhairt amach le cur, aonmhac a mháthar, agus ise ina baintreach, agus sochraid mhór de mhuintir na cathrach léi. ¹³ Agus nuair a chonaic an Tiarna í, ghlac sé trua di agus dúirt léi: “Ná bí ag gol.” ¹⁴ Agus chuaigh sé anonn agus bhain leis an gcróchar, agus stad an lucht iompair. Agus dúirt sé: “A fhir óig, deirim leat, éirigh!” ¹⁵ Agus d’éirigh an marbh aniar, agus thosaigh ag caint, agus thug sé dá mháthair é. ¹⁶ Agus ghabh uamhan cách, agus bhí siad ag tabhairt glóire do Dhia, ag rá: “Tá fáidh mór éirithe inár measc”; agus: “Rinne Dia a phobal a fhiosrú.” ¹⁷Agus leath an tuairisc sin air ar fud Iúdáia go léir agus na tíre go léir timpeall.

“Copyright © 2021 National Council of Churches of Christ in the United States of America. Used by permission. All rights reserved worldwide.”