Matha 14:22-36 ABN
22 Ansin chuir sé d’fhiacha ar na deisceabail dul ar bord agus imeacht roimhe go dtí an taobh thall fad a bheadh sé féin ag scaoileadh na sluaite uaidh. 23 Agus tar éis a scaoilte dó, chuaigh sé an sliabh suas ar leithligh chun guí, agus nuair a bhí an tráthnóna ann bhí sé ansiúd ina aonar. 24 Bhí an bád faoin am sin mórán staideanna amach ón talamh, á bocadh ag na farraigí, mar bhí an ghaoth contrártha. 25 Sa cheathrú faire den oíche, tháinig sé chucu ag siúl ar an bhfarraige. 26 Nuair a chonaic na deisceabail é, agus é ag siúl ar an bhfarraige, bhí siad buartha: “Taibhse atá ann!” ar siad, agus scread siad amach le barr eagla. 27 Ach labhair Íosa leo láithreach: “Bíodh misneach agaibh!” ar seisean, “mise atá ann, ná bíodh eagla oraibh.”
28 D’fhreagair Peadar é: “A Thiarna,” ar seisean, “más tú atá ann, ordaigh mé a theacht chugat ar bharr an uisce.” 29 Dúirt Íosa: “Tar!” Agus tháinig Peadar amach as an mbád agus shiúil ar bharr an uisce ag déanamh ar Íosa. 30 Ach nuair a d’airigh sé chomh borb agus a bhí an ghaoth, rug an eagla air; thosaigh ag dul faoi uisce agus scread sé amach: “A Thiarna, saor mé!” ar seisean. 31 Shín Íosa amach a lámh láithreach, agus ag breith greama air dúirt: “A fhir an bheagán creidimh, cén fáth ar tháinig amhras ort?” 32 Ar dhul isteach sa bhád dóibh, thit an ghaoth. 33 Agus iad seo a bhí sa bhád, d’umhlaigh siad síos ina láthair ag rá: “Go dearfa, is tú Mac Dé.”
34 Ar dhul trasna dóibh bhuail siad talamh ag Geinéasaireit. 35 Nuair a d’aithin muintir na háite sin é, chuir siad scéala ar fud na tíre sin go léir timpeall agus tugadh chuige iad seo go léir a bhí tinn, 36 agus bhí siad á iarraidh air a ligean dóibh fiú amháin a lámh a chur le scothóg a bhrait, agus oiread díobh agus a chuir, bhí siad iomlán.
“Copyright © 2021 National Council of Churches of Christ in the United States of America. Used by permission. All rights reserved worldwide.”
Machnamh on Matha 14:22-36 ABN
Inspioráid - 2025-08-05 Paidir Laethúil
Nuair a chuala Peadar Íosa ag rá leis, ‘Tar’, d’éirigh sé go cróga as an mbád agus thosaigh sé ag siúl ar an uisce i dtreo Íosa. Iarrann Íosa orainn go léir teacht chuige trí na harduithe agus na híslithe a bhíonn romhainn sa saol. An bhfuil an misneach agus an creideamh againn chun muinín a bheith againn go dtacóidh sé linn i ngach cás?
Tugann Peadar an iomarca airde ar an ngaoth agus ar na tonnta agus mar sin bíonn eagla air agus cailleann sé a fhócas ar an Tiarna. Ach tógann Íosa a lámh agus sábhálann sé é. Déanfaidh sé é seo linn in ainneoin ár n-eagla agus ár n-easpa creidimh. Guímis go mbeidh níos mó muiníne againn as.